Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Selasa, 09 Oktober 2012

JAMITA MARKUS 10 : 35 – 45, MINGGU XX DUNG TRINITATIS, 21 OKTOBER 2012






PATUJOLO :

Roha na mangalului hasurungan sian angka dongan na asing, nunga hira gabe bangko i di parngoluon on. Ragam do angka cara dibahen jolma asa anggiat boi marhasurungan sian angka donganna. Jala molo balikna do na masa, gabe sumurung halak na asing, na boi do i gabe patubu pangiburuon sahat tu na manghosomi. Sangap manang hasangapon, mansai na ringkot do i di hajolmaon. Di habatahon rupani, marsiadu do jolma mampareahi hasangapon siangkup ni hagabeon dohot hamoraon, na tolu hadirion on ma na gabe  sintasinta na tumimbo.
Asa ido umbahen gabe adong tubu pandohan ni halak Batak na mandok : “ Simbora gukguk duldul otik, mamora hita luhut alai sumurung au otik “.Bangko ni jolma na sai mangalului hasurungan, ido na dipatuduhon umpama i, ingkon ibana do sumurung sian donganna asa sonang rohana. On ma sada pandohan na padimposhon paboa memang na sai mian dope di roha ni angka jolma na sai mangalului hasurungan na marlobi maradophon angka donganna na asing.
Bangko na songoni ma na tubu di roha jala na dipataridahon dua halak sian sisean ni Tuhan Jesus na margoar si Johannes dohot Jakobus, na boi do i idaonta marhite pangidoan nasida tu Tuhan Jesus dibagasan turpuk sadarion.

HATORANGAN :

Ayat 35 – 37 :
Na ro do si Jakobus dohot si Johannes anak ni si Zebedeus tu Tuhan Jesus, laho pasahathon pangidoan na digohi “ambisi”. Molo taida do pangidoan ni sisean i di ayat 37, boi dohonon na sinonggopan ni pamingkirion messianik haJahudian dope nasida. Molo konsep Messianik mangihuthon haJahudion, ima : Ia Messias na naeng ro i, laho pajongjonghon dohot paulakhon hadirion ni bangso Israel, songon sada bangso na balga jala na hinabiaran ni angka bangso na asing. Mangihuthon konsep ni Jahudi, ia Harajaon ni Debata na binoan ni Tuhan Jesus ima pajongjonghon muse harajaon ni Raja David songon di Padan Narobi, pomparan ni Raja David ma na manggomgomi portibion jala unduk ma saluhut bangso tu nasida. Mesias, na pajongjonghon harajaon songon partingkian ni Raja David do Mesias na diantusi jala na dihirim angka sisean i songoni halak Jahudi secara universal hatiha i. Mesias politik dohot harajaon songon na diportibion do na dipahami nasida, napaluahon halak Jahudi sian gomgoman ni bangso Rom hatiha i jala gabe harajaon na berdaulat dohot na marhuaso gumonggom portibion do harajaon na binoan ni Mesias i di roha nasida.
Di na tarihot dope sisean i tu konsep ni haJahudion taringot tu haroro ni Mesias, patuduhon sada pangantusion na lipe taringot tu harajaon ni Debata. Pangantusion na lipe taringot tu “status kemuridan” na dihonahon tu nasida. Pangantusion na lipe ido na mangonjar roha dohot pingkiranna pasahathon pangidoan tu Tuhan Jesus , asa anggiat hundul nasida nadua di siamun nang di hambirang ni Tuhan Jesus di hasangaponNa. Hasangapon na adong di pingkiran nasida dison, tontu hasangapon na marhadomuan tu portibi on do. Na tubu do di roha nasida bangko na mangalului hasurungan dohot hasangapon.
Pangidoan nasida i patuduhon sihol ni roha dipangkat na timbo dohot kedudukan na sumangap sian angka sisean na asing. Gabe na sumangap na marlapatan gabe jolma nampuna pangkat, jabatan dohot hadirion na tumimbo jala na arga. Alani i gabe adong ma sada partingkian asa boi mamarenta donganna huhut manghobasi nasa na ringkot di ibana. Angka parange na ambisius dohot terobsesi di hasurungan  dohot hasangapon nang huaso do na pinatuduhonna disi.

Ayat 38 – 39 :
Tung mansai denggan jala lambok do hata ni Tuhan Jesus mangalusi pangidoan ni siseanNa i. “ … Ndang diboto hamu na pinangidomuna i…” . Hata on naeng mangondolhon paboa na so adong dope pangantusion na sintong di angka sisean i taringot tu ulaon na pinatupa ni Tuhan Jesus. Naeng dohonon dison, molo naeng mangido sasahalak, naeng ma nian antusanna aha do na pinangidona. Naeng ma tangkas antusan paboa naung talup do manang ndang manjalo pangidoanna. “ ….Tung tarinum hamu ma siinumonki? Tung tarparidi hamu ma paridion siparidionki? “ (ayat 38).  Marhite na dua pandohan i (panginumon dohot paridian), Tuhan Jesus naeng paingothon nasida, paboa ulaon na mansai borat situtu do pangidoanna i.
Hata ni Tuhan Jesus dison martudutudu ma i tu kondisi na naeng adopan ni angka sisean di angka ari na mangihut, ima hamaolon dohot angka abatabat songon sada sisean sitindangi Harajaon ni Debata, manorushon ulaon ni Tuhan Jesus dung manaek tu banua ginjang. Manang ise na naeng parsidohot di hasangapon ni Tuhan Jesus, ingkon do jumolo parsidohot di sitaononNa. Molo didai jolma na tonggi na marTuhanhon Tuhan Jesus, ingkon rade do nang mambondut na paet, i do na naeng dohonon ni Tuhan Jesus marhite pandohanNa i.
Umbege alus ni Tuhan Jesus i, manigor hatop do ruar alus sian nasida nadua. “ …. tarbahen hami do …” (ayat 39). Sada alus na mahatophu do on, sada alus na so jolo mamingkirhon aha do sasintongna lapatan ni pandohan ni Tuhan Jesus tu nasida. Alai nang pe songoni, diparhatopot Tuhan Jesus do nian alus ni siseanNa i. Ala memang aeon ni sisean nadua ido muse songon na nidok ni Tuhan Jesus taringot tu sitaonon i, ai di laonlaon ni ari memang na mate martir do si Jakobus hinorhon ni ulaonna songon sada sisean ni Kristus (Ul.12:1-2)., jala si Johannes tarbuang do muse tu Pulo Patmos (Pgk.1:9) .

Ayat 40 :
Tung Saguru di Ama i do na manontuhon hundulan disiamun manang dihambirang, holan halak na manghamonanghon parungkilon mangihuthon Jesus na sahat tu ujungna do na manjalo i. Debata Ama i do na mangalehon balos ni tu angka na satia sahat ro di ujungna. Taringot tu ise na di siamun manang siambirang, andigan harorona, tung holan Debata Ama do umbotosa, jala nunga diparade i di angka na porsea. (Patudos Markus  13:32 Alai anggo arina dohot sadiharina, ndang adong na umbotosa, nang surusuruan na di banua ginjang, nang Anak i pe; nda holan Ama i).

Ayat 41 – 45 :
Ambisi na songgop tu sisean nadua i, gabe patubu hagaoron do i di roha ni angka sisean na asing. Siala parsiguluton di hasurungan i gabe ganggang do parsaoran ni angka sisean i. Ai dung sahat pangidoan ni sisean nadua i tu sipareon ni sisean na sampulu i, gabe sogo ma roha nasida di si Jakobus dohot Johannes (ayat 41). Boasa sogo roha ni sisean na sampulu i ? Ndang pola bangkol aluson sungkun sungkun I, Ala sisean na sampulu i pe girgir do di dihasurungan dohot hasangapon (pat. Mat 19:26), ai hea do gabe bahan perbincangan i di nasida taringot tu ise do na sumurung jala na sumangap sian tongatonga nasida (pat. Mark 9:33-34). Na songgop do roha biar di nasida, ai dirajumi nasida do molo dioloi Jesus pangidoanna i gabe sumangap ma na dua i sian nasida. Asa elat ni roha marnida hasurungan ni dongan do na mangonjar sogo ni rohanasida i. Mangida situasi na masa hatiha i. Gabe tubu ma sada inisiatif di Tuhan Jesus, dipapungu ma sisean i, dipatorang Jesus ma tu nasida taringot tu harajaon ni portibion dohot Harajaon Banua Ginjang, asa unang gabe sega parsaoran ni angka sisean i. molo di portibi on huaso manang hatauon mangarajai jala patunduk halak do suhatsuhat ni hasangapon.
Hinorhon ni huaso, barani do halak mangasahon gostong ni botohon. Alai andul sumurung do ianggo Harajaon ni Debata,  holong do na gabe ojahanna jala roha pangoloion do suhatsuhatna.
Dipaingot jala dipodai Tuhan Jesus do angka siseanNa i, diparsiguluton  taringot tu ise do na umbalga jala sumangap sian tongatonga ni angka sisean.  Didok Tuhan Jesus, Manang ise hamu na giot sangap, i ma gabe pangoloi di donganna! Jala manang ise hamu, na naeng parjolo, i ma gabe naposo ni donganna saluhutna. (ayat 43b-44). Na marlapatan do i ; Ia halak na naeng marsangap, ingkon do olo gabe pelayan (Diakonos). Jala halak na giot rohana gabe sipatujoloon : (“to be first”), ingkon do olo gabe hatoban (Doulos). Tuhan Jesus sandiri do tahe na gabe tudosan taringot tu na nidokNa i. ai na ro do Ibana tu portibi on ndada asa dioloi halak, Ibana do tahe mangoloi jala mangalehon hosaNa bahen tobus ni torop halak (ayat 45)
Sipahusorhusoron :

1.      Roha na mangalului angka hasurungan na boi do i patubu angka : late, hosom dohot parsalisian. Na boi sega do angka punguan, lembaga manang organisasi hinorhon ni na mangalului masihasurungan manang marsigulut di hasangapon.
2.      Asa marhite turpuk on, tarjou do hita manongtong mangulahon i. Ganup ari dohot ganup tingki tarjou do hita manarihon na ringkot di angka dongan na humaliang.
3.      Ringkot do nang hita hita manaluhon roha diri dohot manaluhon roha na mangarajumi sumurung sian dongan. Tarjou do nang hita saluhutna asa gabe nasumangap marhite na manaluhon roha diri jala sian toruk ni roha tarajumi dongan jolma sumurung sian dirinta (bd. Filp. 2:3).
4.      Molo naeng sumurung jala na parjolo pareahi ma dalan na tingkos jala sintong. Ndada marhite na mangarajai dongan, ndada gabe sihobasan, ndada marhite gabus .
5.      Songon sintongna siihuthon Jesus hita, ingkon nirajuman ma diriniba "hatoban". Saleleng so pangarajumion paboa na hatoban ni Kristus hita, saleleng ima mian jala songgop ginjang ni roha, ndang dao sian haserepon. Jala taingot ma tongtong paboa nunga diulahon Jesus si songoni jumolo, ido umbahen didok Ibana, "Ai nang Anak ni jolma i pe, ndada asa dioloi halak Ibana, umbahen na ro; Ibana do balik pangoloi jala mangalehon hosana bahen tobus ni torop jolma". Amen.
Pdt. Samuel RP Aritonang, S.Si
Pendeta GKPI Resort Kampung Juhar

Tidak ada komentar:

Poskan Komentar