Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 21 Mei 2012

JAMITA MINGGU PENTAKOSTA, 27 MEI 2012 “ ROM 8 : 22 – 27




Patujolo :
Sitaonon, parungkilon, hamaolon, ima angka panghilalaan na ingkon songgop tu partingkian ni hajolmaon. Asa ido umbahen sai didok paortibi on rura partangisan, ala ingkon do sahat parungkilon i saleleng mian dope hita di portibi on. Alai aha do na gabe hasurungan ni angka na porsea di na mamolus parungkilon na porsuk di portibi on? Marhite turpuk jamita sadarion di ari pesta hasasaor ni Tondi Parbadia, diuji do patoranghon pangulaon ni Tondi Parbadia di ngolu ni angka na manghaposi Debata molo songgop angka parungkilon.


Hatorangan :
Ndang sada jaminan molo  halak na porsea di Tuhan i hita gabe malua sian parungkilon, manang hamaolon, gariada tahe na boi do gabe tamba sitaononta di portibi on hinorhon ni haporseaonta i. Adong do dua sibonsiri ni sitaonon na masa tu parngoluon on, parjolo : masa pe sitaonon i hinorhon dirinta sandiri (alani hagaleon ndang boi mangarajai diri). Na paduahon : Boi do hinorhon ni haporseaonta di Jesus Kristus. Asa dohonon ma ndang jaminan lam moru sitaonon ni angka na porsea, alai sitaonon na nidokna pe dison porlu dope sipahembangon, sitaonon na songon dia do.

Ay.22 :
Torang do dipatorang Apostel Paulus dison paboa sude do na tinompa ni Debata rap marhoi jala mambebe. Na nidokna dison, ndada holan jolma i na marsitaonon, ndada holan angka na porsea i na marsitaonon, alai tung dohot do tahe saluhut angka na tinompaNa, ima angka suansuanan, pinahan, hajanghajang ro di saluhut parlangitan, sandok saluhut do tahe angka na porsea dohot na so porsea. Gombaran ni sitaonon dison ima marhite na maheu dohot mambebe. Molo pola sitaonon i sahat tu na mambebe (mengeluh), patuduhon hahansiton ni sitaonon ido i.

Ay. 23 :
Asa nang pe parsidohot do angka na porsea i  di sitaonon na maheu dohot mambebe, alai on ma hasurunganta maradophon angka na so porsea. Molo angka na so porsea nda tung adong panghirimonna i. Alai anggo angka na porsea didok do di ayat 23 on, angka na porsea naung manjalo patumonaan ni Tondi i, adong dope sihirimonta, ima status “haanakon” na paluahon pamatangta sian na sorat I, asal ma olo hita ditogihon Tondi i. ai nasa na tinogihon ni Tondi ido na targoar Anak ni Debata jala molo donganta Ibana di sitaonon, donganta ma Ibana di hasangapon (Rom 8 : 14 – 17 ).
Ay. 24 – 25
Asa molo targoar hita Anak ni Debata na tinogihon ni Tondi i, tontu sai adong do jala godang do angka hasurunganta sian na so targoar anakhonNa. Angka dia ma hasurungan i.
Na parjolo : “Panghirimon”. Asa Holan Tondi ido na tuk margogoihon hita patubu panghirimon na mangolu. Alai ndada hita na manontuhon suhatsuhat ni panghirimon i, ima panghirimon na so dung dope niida, alai nunga tangkas i diparade Debata.
Na paduahon : “Habengeton ni roha “. Molo lam togu panghirimonta, tontu lam marbenget ni roha ma hita manghirim di haluaon I (ayat 25). Panghirimon ido patubu habengeton ni roha.
Na patoluhon : “Haradeon ni roha”. Molo nunga adong panghirimon na mangolu, tontu gabe marbenget ni roha ma hita manaon disi, jala  hinorhon ni i, gabe tubu ma muse haradeon ni roha. Ima haradeon ni roha na mangaloas Tondi i mangula di ngolunta.
Ayat 26 – 27  :
Mangula do Tondi i laho patingkoshon pangidoanta tu Debata, asa ditongos pangurupionNa laho mangatasi angka hagaleonta i. Molo didok dison na diondihon Tondi ido hita, na marlapatan do i : Dipatangkas Tondi ido tu hita sangkap ni Debata di hagaleonta i, asa nang pe marhoi hita, na ingkon lomo dohot sangkap ni Debata do na ingkon tapasaut di parngoluanta.

Panimpuli :
·         Taingot ma sadarion hasasaor ni Tondi Parbadia, ima Tondi na margogoihon hita manghirim, marbenget ni roha jala patubu haradeon ni roha manjalo sangkap ni Debata na masa di ngolunta.
·         Saluhut pardalanan ni ngolunta,  parngoluan saonari dohot ngolunta sogot naeng ma marpardomuan tu lomo ni roha ni Debata, ai dao do ummuli sangkap ni Debatanta i  sian angka na tasangkapi.
·         Tajanghon ma haanahon ni Debatanta i, asa mangula Tondi i dibagasan rohanta. Ai marpanumpak tu na denggan do sude na nilehonNa tu hita, nang pe sipata jala jotjot maol taantusi angka dalanNa.
·         Asa molo pe sipata suhar tapingkiri angka na masa di ngolunta, sai anggiat ma unang meret rohanta sian panghirimon i, ai panghirimon ido patubu habengeton dohot haradeon pasauthon sangkap ni Debata na masa di ngolunta. Amen.

Tidak ada komentar:

Poskan Komentar