Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 14 Mei 2012

Jamita Minggu Exaudi, 20 Mei 2012 Psalm 1 : 1 – 6



Patujolo
Psalm na marlapatan ende pujipujian tu Debata sian angka na porsea taringot tu na masa dingoluna maradophon Debata. Psalm Bindu 1 on, digoari do i : ende habisuhon. Boasa didok ende habisuhon? Ala marisihon poda laho mangajarhon dalan tu ganup jolma manang dia sipareahonna. Angka dia ma na disoarahon psalm bindu 1 on, asa didok gabe sada ende habisuhon? Idaonta ma i marhite hatorangan na adong di turpuk on.
Hatorangan
Padao diri sian tahi ni parjahat
-          Dipaingot dison asa dipasiding angka bangko bangko na boi mambahen madabu tu bagasan hajahaton
-          Ragam do cara ni hajahaton mambahen hita lalap, asa marhite i naeng hita ingot tongtong di 1 Petrus 4 : 8, (Torang ma rohamuna, ai na maotaot do sibolis i, songon babiat na marauang mangalului sibondutonna).
Dang olo jongjong di dalan ni angka pardosa
-          Pandohan on mangigil jala mangajarhon asa tongtong dipasiding dalan ni angka pardosa.
-          Unang olo jongjong di dalan ni angka halak na marpangalaho tundal maradophon Debata
Dang olo sahundulan dohot angka pangarehei
-          Parhundul ni sasahalak patuduhon status manang hajongjongan do i. mansai arga do parhundul molo di hajolmaon tarlumobi nang di habatahon.
-          Parhundulon manggombarhon hajonohon do I, ido umbahen didok : “ Jonok partubu, alai jonohan do parhundul.
-          Hombar tu si ma dipodahon dison asa unang sahundulan hita dohot halak pangarehei, parhata tundal, halak na sai berpikiran negatif maradophon halak na asing, halak na sai olo paburuk burukhon donganna, halak na olo manghatindanghon hata na so tutu maradophon dongan jolma.
-          Dison tangkas didok asa sipadao on ni angka na porsea do sikap na songoni.
-          Ndang na mandok na so boi sahundulan dohot angka pangarehei, molo bertujuan asa muba do dongan i umbahen na sahundulan hita, tung na denggan do i. alai unang ma balikna gabe laos parsidohot hita mangundukhon pangalaho na so suman i.
Hangoluhon patik ni Debata
-          Manghangoluhon patik ni Debata na marlapatan do i, manghabiari jala manghaholongi Debata sian nasa roha, gogo, ateate, nang pingkiran,
-          Na marlapatan do i muse : marhaunduhon di adopan ni Debata jala tongtong mangoloi Ibana.
-          Songon hau na sinuan di ditopi ni batang aek do na manghangoluhon patik ni Debata, ima na sai tongtong mamparbuehon na denggan tu angka na humaliangna.
-          Na manghangoluhon patik ni Debata jala na so sahundulan dohot angka pangarehei, saluhut na niula ni tanganna manjadi do. Jala gabe pasu pasu ma i tu dirina sandiri dohot tu angka na humaliangna.
Panimpuli :
-          Dijou jala diarahon par psalm on do hita mamillit dalan sibolusonta di ngolunta.
-          Tangkas do dipodahon dison, aha do upa sijaloon ni angka na manghangoluhon patik ni Debata, jala aha do upa sijaloon ni angka pangarehei dohot angka parhata tundal maradophon donganna.
-          Songon halak naporsea, tontu naeng ma pillitonta joujou ni Debata asa manghangoluhon patik na, asa dapotan pasupasu na manongtong hita, nang angka pinomparta pe taruli ma di angka na uli na denggan i. amen.

Tidak ada komentar:

Poskan Komentar