Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 09 April 2012

JAMITA MINGGU QUASIMODOGENITI, 15 APRIL 2012 1 Johannes 1 : 1 – 7



Patujolo :

Mansai ringkot situtu do barita na pinasahat ni angka sitindangi (saksi mata) laho manangkasi molo adong na masa. Jala hatorangan na binahen ni angka saksi mata do na gabe pertimbangan laho mambuat sada keputusan, ai saksi mata ido na marnida jala na umboto aha do na masa.
Songoni ma nang na binahen ni si Johannes di turpuk on, dihatindanghon ibana do taringot tu angka na niida dohot na binegena taringot tu ulaon ni Tuhan Jesus. Panindangionna ima na gabe turpuk di minggu on.

Hatorangan :

Ayat 1 – 4 “ Sitindangi ni Kristus
Dibagasan panindangionna, digurithon ibana do dison paboa naung dibege, diida, dipanotnoti, jala dijama tanganna taringot tu hata hangoluan i. Hatana ima naeng patuduhon paboa sitindangi (saksi mata) na boi dihaporseai do angka hatana, ai ndada holan dibege ibana barita hangoluan i, alai tangkas do diida, dibege, dipanotnoti ibana hata hangoluan, ima ulaon ni Kristus i di ngoluna. Boi dohonon ndang siraguhononhon be barita manang kesaksian na binahenna i. Nunga patar be hangoluan i marhite ulaon ni Tuhan Jesus na hinatindanghonna. Jala ima nuaeng dibaritahon ibana tu angka ruas ni huria hatiha i marhite surat na tinongosna on. Asa marhite panindangion i, diigil rohana do asa gabe tubu angka parsaoran dohot Debata. Na nidokna dison, naeng ma nian marhite kesaksian na binahenna i, gabe tubu angka parsaoran na olo pasangaphon Jesus i.

Ayat 5 : Panondang dohot haholomon
Barita na dihatindanghon si Johannes dison ima : paboa panondang do Debata na manorangi ganup angka parngoluon. Mansai ringot do panondang i, dingolu ni jolma. Jala jotjot do digoari Jesus i panondang di portibi on. Adong do manang piga hali digurithon di bible i taringot tu hajongjongan ni Jesus songon sada panondang. Boasa pola huroha tu panondang dipatudos Jesus diriNa di portibi on. Boi dohonon ala mansai ringkot do peranan ni panondang i dingolu ni jolma. Adong do manang piga peranan manang lapatan ni panondang i di ngolunta on, :
-          Marhite panondang gabe boi tiur parnidaanta, jala marhite i gabe boi hita mula ulaon.
-          Marhite panondang gabe ndang tartuktuk hita molo mardalan
-          Marhite panondang gabe las manang mohop tahilala.
-          Marhite mohop ni panondang i (mataniari) gabe boi angka pangula manjomur na niulana.
-          Dna.
Ayat  6 – 7 : Mangolu dibagasan hatiuron
Molo mardalan hita di na holom bangkol do tahilala jala susah do hita mandalani i, asa songon di na holom ma tudosan ni parngoluanta molo so mian dope hita dibagasan Kristus i. ndang tardok naung saor dope hita tu Jesus i, molo sai taulahon dope angka ulaon haholomon i. Ndang tardok dope hita anak hatiuron molo sai mian dope rohanta mangulahon ulaon haholomon. Asa sasintongna ndang tardok dope hita halak Kristen molo sai mian dope hita di dalan na holom i, pola didok si Johannes di ayat 6, angka pargabus jala ndang siula hasintongan molo tadok hita naung saor tu Ibana hape huhut taulahon na holom. Tadok hita halak Kristen hape tatondong dalan hamagoan i (patudos tu Ende No. 182 : 3 , … Kristen au, hape hutondong dalan hamagoan i).  Na targoar saor tu Tuhan Jesus, ima angka halak na sai mian di dalan na tiur i (ayat 7), jala molo saor hita tu Ibana, saor do nang hita tu angka dongan, jala marhite na saor hita tu Ibana, paiasonNa ma hita sian dosanta.

Panimpuli :
Minggu quasimodogeniti na marlapatan : “ songon posoposo na uasan di susu na tama” , paingothon hita asa mauas diparsaoran na tama dohot Jesus bona ni hangoluanta i. Ibana do Hata/ Logos na gabe daging paluahon hita sian dosa dohot hamatean. Saluhutna angka na porsea ingkon patoguhon parsaoranna di bagasan Ibana. Parsaoran na ni rahut ni sada parsaoran, sada sibasabasa marhite naung niurasanNa sian dosa. Hauasonta marsaor dohot Tuhan Jesus pabosurhon partondionta di hasintongan ni Debata. SondanganNa ma ngolunta, dao angka haholomon , Ibana na gabe panondang patontuhon pardalanan ni ngolunta manuju sambulo ni tondinta. Mian ma di bagsan Jesus Kristus asa manongtong imbaru ngolunta nang parangenta pe. Amen    

Tidak ada komentar:

Poskan Komentar