Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 16 April 2012

JAMITA MINGGU MISERICORDIAS DOMINI, 22 APRIL 2012 Rom 8 : 14 – 18



Patujolo
Miduk do angka jolma na mangharingkothon siteanon sian natuatuana, jala natuatua pe tarsomal do mambahen padan testamen (surat wasiat) taringot tu parartaonna asa molo dung marujung ngoluna haduan boi ma dapotan bagian sude angka ianakkonna. Ido umbahen diharingkothon halak Batak marianakhon asa adong do panean haduan. Pola do sada-sada keluarga mangadopsi sahalak dakdanak gabe ianakhonna molo so adong ianakhonna sandiri asa adong muse manorushon angka siteaonon i. Sahalak natuatua boi manghaposi ianakhonna gabe panean ala naung porsea do ibana halak na boi haposan do ianakhonna i. Autsura ndang haposan iankhonna i ndang olo natuatua mambahen gabe panean. Songon i do nang na pinatorang ni turpkta sadarion, ima na ni ain ni Debata hita gabe ianakhonNa asa gabe panean di harajaonNa.

Hatorangan ni Turpuk
Tondi ni Debata
Tondi na ni lehon ni Debata tu manisia ndang sarupa songon tondi na sian portibion. Molo tondi na sian Debata ima tondi na pabotohon angka ulaon na denggan di parngoluon ni manisia, marhite tondi on ma boi ta alo angka hagiot ni daging na sai maralo tu lomo ni roha ni Debata. Tondi ni Debata ndang boi dituhor manang dilului alai Debata sandiri do na mangalehon tondi i tu hadirionta asa tondi i na mangajari tondi pardagingonta mangoloi Debata. Tondion ma na mangajari manisia mananda Debata, marhite panjounta di Ibana na mandok: Abba, lapatanna gabe adong ma parsaoran na jonok dohot Debata ala nungnga tatanda marhite pangajarion ni tondi i. Tondi naung ni lehon ni Debata tu manisia gabe maringanan ma di ngolunta alai ndang na gabe lomonta di tondi i. Ndang gabe guru di manisia anggo tondi i,  justru balikna, tondi na mian di ngolu ni manisia i do na gabe guru di ngolunta.
Anak ni Debata
Molo anak ni Debata di hata gorik didokma i huios,  lapatanna anak yang dipimpin. Artina molo nga gabe anak ni Debata do jolma i, na marlapatan do i  ingkon gabe anak na olo sitogihonon ni Debata do hita. Hadirion ni jolma songon anak, mamuhai parsaoran na rosu dohot Debata. Unikna muse hadirion ni jolma gabe anak ni Debata ndang alani dalan manang usaha ni jolma, justru Debata sandiri do na ro mangalehon tondiNa tu jolma gabe boi ianakhonNa, lapatanna adong silehonlehon sian Debata na mamboan hita sahat tu hajongjongan i. Anak ni Debata ndang na gabe anak secara biologis hita alai lobi sian status biologis, gabe anak hita songon Kristus na gabe anak ni Debata. Berarti molo anak ni Debata do hita nungnga ingkon mian be Debata di ngolunta, berarti ingkon nga sarupa be parulaonta nang pingkiranta songon parulaon dohot pingkiran ni Debata. Ndang marimbar be anak sian bapana (Luk. 20:34, 36; Joh. 5:17-27). Asa gabe boi manisia manjouhon Abba tu Debata. Molo abba di tradisi ni halak Jahudi ima panjouon ni sahalak dakdanak na poso na jonok dohot amana. Panjouonon holan dijouhon ianakhonna tu amana molo sahalak ama na burju do amana i, alai molo so burju amana i ndang dijou abba. Dibuat Debata do hita gabe ianakhonNa ndang na laho mangalului keuntungan di Ibana sambing, justru naeng mamboan jolma i do tu hangoluan.
Panean di Debata
Songon anak ni Debata jolma i, gabe adong ma hak di hita gabe panean di Debata. Panean na dimaksud di turpukon ndang songon panean di portibi na dijalo di tingki dung mate natuatuana. Na dimaksud gabe panean di Debata di son, ima na dilehon Debata tu manisia hamuliaon na adong di Ibana asa dapotan hangoluan na salelenglelengna. Panean lapatanna adong pangkirimon tu ari sogot na nilehon ni Debata tu hita, alai molo ta oloi panogihonon ni tondi ni Debata di ngolunta jala molo tahaporseai ulaon ni Jesus di ngolunta. Ai angka halak na tinogihon ni tondi do dohot halak na porsea do na digoari sipanean ni Debata (Rom 4:13-18; Gal. 3:29: 4:7). Na adong di Debata i do na dilehon tu manisia naung gabe ianakhonNa i. Adong keistimewaan ni manisia di son; ima nungnga diangkat Debata hita gabe ianakhonNa marhite tondi, dibahen muse manisia i gabe panean.
 Sitaonon na manjangkon hasangapon
Di ayat parpudion boi do berengonta sada peneguhan sian si Paulus tu huria Rom hatiha i na di bagasan haporsuhon. Ai pola do adong penyiksaan tu saluhut halak Kristen na adong di Rom hatiha i. Jala dipaksa angka pangomgomi do saluhut halak Kristen gabe hatoban ima na ingkon marsomba do nasida tu  angka raja na manggomgomi di Rom, molo so dioloi parentaon na ingkon hona uhum ma nasida. Alai didok si Pauilus do asa tong satia saluhut angka Kristen na di Rom tung pe hansit dihilala nasida, ai gabe panean di Debata ma nasida sogot. Ai sasintongna nungnga diparade Debata hamonangan ni manisia na porsea, na olo mangalo portibion.
Panimpuli
Nungnga dilehon Debata tu ngolunta TondiNa asa diajari hita mangalo hagiot ni daging jala mangihuthon lomo ni roha ni Debata. Jala marhite tondi i nungnga diain hita gabe ianakhonNa, na marlapatan boi hita membina parsaoran na rosu dohot Debata. Asa taihuthon ma parange ni Debata di parngoluonta songon anak hita na patut mangihuthon amana asa tarbahen hita gabe panean di Debata, songon panean ni Kristus. Tung pe ta adopi hamaolon di portibion na ingkon ma ta hajugulhon mangulahon lomo ni roha ni Debata, ai ndang sadia sitaonon di hasianganon martimbangkon hasangapon sipapataron tu hita sogot ima na gabe panean na manjalo padan sian Jahowa. Amen

Tidak ada komentar:

Poskan Komentar