Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 19 Desember 2011

Jamita Minggu 25 Desember 2011 (Natal I) 1 Johannes 3 : 1 – 6





Patujolo :

Ari na balga do sadarion di saluhut halak Kristen di sandok portibi on. Didok ari na balga, ala jumpang ma musengani di hita parningotan di hatutubu ni Tuhan Jesus Kristus. Ndang habilangan hita be ra manang naung piga hali itahalashon angka pesta natal mamungka adong hita di portibi on sahat tu sadari on,  isarani : natal di huria, STM, punguan marga, dna. Alai nang pe so habilangan hita be i, boha do ulaning panghorhon ni natal i dingolu naung tabolus?. Manggunjal dope ulaning roha parbagasanta ganup itahalashon pesta natal i. Jala aha do sasintongna panghorhon hatutubu ni Jesus i dinglu ni angka na porsea. Angka ima sipahembangonta marhite hatorangan jamita di Minggu Natal na parjolo sadarion.


Hatorangan :

Marhite hatutubuna targoar ma hita anak ni Debata.

Boha do dalanna asa gabe targoar hita anak ni Debata? Anggo di mulana i, na ginoaran anak ni Debata ima bangso Israel (2 Musa 4 : 22 – 23). Dipartingkian na mangihut margeser ma muse hajongjongan ni anak ni Debata. Ndada sude bangso Israel be na gabe anakNa, alai holan angka pinompar ni si Abraham, ompu ni na porsea ido na ginoaran angka anak ni Debata  (patudos : Rom 9 : 6 – 8). Ala nang pe didok dison pinompar ni si Abraham, ndada ala pinompar sian mudar i, alai sian haporseaon do na nidokna disi. Na marlapatan, manang ise angka na satia jala porsea songon haporseaon ni si Abraham. Ibana ma na targoar gabe anak ni Debata (Galatia 3 : 7 – 9). Asa sian i botoonta ma na gabe sada syarat asa gabe targoar anak ni Debata ima marhite haporseaon sambing.

Di na sorang hita tu portibi on, ndang hea dope binege adong jolma na boi mamillit asa gabe marga aha ibana, manang asa gabe anak ni na mora ibana ditubuhon. Ndang boi taatur manang andigan hita sorang di portibi on.  Alai marhite hatutubu ni Tuhan Jesus naung dos gabe jolma na sorang di bara ni pinahan, gabe dilehon do hita nuaeng pilihan manang kebebasan laho mamillit. Ia pilihan na dilehon tu hita, ima gabe anak ni ise do hita? Anak ni Debata do manang gabe anak niu sibolis?. Asa pilihan i bebas do hita manontuhonsa. Asa gabe anak ni sibolis tontu nang so pinatorang dison nunga taboto carana manang na songon dia. Alai anggo asa gabe anak ni Debata, aha do na gabe syaratna? Molo tajaha Galatia 3 : 26 didok “ Ai saluhut do hamu anak ni Debata marhitehite haporseaon di Kristus Jesus “. Sian hatorangan ni ayat i tung tangkas ma taboto, ia na gabe syaratna ima : “porsea di Kristus Jesus”.  Asa marhite hatutubuNa ido diungkap Debata nuaeng dalan di hita laho mamillit ise do na tahaposi dingolunta. Tontu hatop do hita mandok anggo syarat i nungga be tagohi, alana porsea do hita di Kristus, gabe halak Kristen don hita. Alai naeng tangkas botoonta, nangpe  halak Kristen hita ndang gabe jaminan i gabe anak ni Debata hita ia so adong hataridaan ni haporseaon i marhite parbue na denggan. Jala na mngihut muse asa gabe anak ni Debata hita targoar ingkon rade do hita manjanghon Ibana. Tajaha ma di Johannes 1 : 12 “ Alai manang piga na manjanghon Ibana, tusi do dilehon huaso, asa gabe anak ni Debata nasida, angka na porsea di goarNa “. Manjanghon dison marlapatan gabe sanghambona hita raphon Debata dibagasan Jesus Kristus.

Aha do sihirimon molo gabe anak ni Debata?

Molo manuhor situhoron hita, tontu tapillit do na dumenggan kualitasna asa unang gabe kecewa hita laho mamparhaseanghonsa. Tontu manat do tauji, dung ipe asa tatuhor. Songoni do nang na mamillit sibolis dohot Jesus, denggan do lam botoonta dia do ulaning hinauli ni molo gabe tapillit Jesus di ngolunta. Adong do manang na piga angka na uli na boi dapot hita molo gabe anak ni Debata hita.
1.      Marhuaso do Debata, ndang adong na so tarpatupa Debata, jala olo do Debata marmahani ngolu ni na pajonokhon dirina tu Debata. Asa marhite i, on ma na jumolo haulion na boi dapot hita molo gabe anak ni Debata, “sarihononma ma hita diangka na ringkot dingolunta”
2.      Psalm 121 : 3  mandok : “ Ndang hea nok mata ni sijaga hita “. Di Jesaya 49 : 16 didok “ ditelapak tangan ni Debata do hita dibahen”. On ma haulion na paduahon molo gabe anak ni Debata hita “ jagaon jala ramotanNa ma hita di dalan na tabolus”.
3.      Molo gabe anak ni Debata hita, ndang hatoban ni sibolis be hita, alai gabe panean nama di harajaonNa sogot.
4.      Huaso ni Debata i, boi ma pangkeonta laho patupahon angka halongangan, isara ni : pabali sibolis, pamalum na marsahit, dna (Markus 16 : 16 – 17).
Aha do kewajibanta molo gabe anak ni Debata?
Nunga tapajojor nangkin angka aha ma sihirimonta molo gabe anak ni Debata hita, nuaeng tontu adong do kewajiban sigohanta molo targoar anak ni Debata, isarani tanggung jawab ni ianakhon tu natoras, hita pe adong do na gabe tanggung jawabta molo targoar hita anak ni Debata.
1.      Molo di halak Jahudi ingkon jolo magodang do sasahalak asa boi panean di arta ni natorasna. Molo so magodang dope ndang tama dope i manean arta ni natorasna. Asa ima nang tudosan molo gabe anak ni Debata hita, ingkon magodang do hita di haporseaon asa tama hita panean di arta na sumurung i. saleleng marpengpeng dope haporseaonta, ndang tama hita manean arta na sumurung i. on ma tanggung jawab na parjolo : ingkon boi magodang di haporseaon.
2.      Tarida do haporseaon ni sasahalak marhite cara berpikir, manghatai dohot mar parange. Asa on ma tanggung jawab na mangihut siulahononta, pinatuduhon ma nian parbue ni haporseaon i.
3.      Adong komunikasi na denggan. Molo targoar anak ni debata ingkon tarida ma parsaoran manang komunikasi na rosu dohot Debata, marhite ende, tangiang nang pamujionta. Molo so hea dipanghulingi ianakhon na di pangarantoan hita, tontu jut do rohana, ima gombaran roha ni Debata molo so hea tapanghulingi Ibana marhite na pasangaphbon Ibana dijabu nang di bagas joro pe.,
Panimpuli :
Antong di tonga tonga las ni rohanta di ari Natal on, naeng ma tapillit Debata gabe Amanta, jala hita gabe anakhonNa. Alai ndada otomatis hita gabe anak ni Debata molo gabe halak Kristen hita.  Na ingkon mangihut do parbue ni haporseaon i asa gabe targoar hita anak harajaon ni Debata.
Marhite natal on, lam tapature ma dirinta gabe marpangalaho dohot berkarakter anak ni Debata. Molo tutu do na holong rohanta tu Debata, ulahononta ma antong lomo ni rohaNa

















Tidak ada komentar:

Poskan Komentar