Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 28 November 2011

JAMITA MINGGU ADVENT II, 04 DESEMBER 2011 JESAYA 63 : 15 – 19 ; 64 : 1 – 3




Patujolo :
Asa ummura antusanta turpuk on, ingkon jahaonta do nian mamungka sian ayat na dijolona. Molo tajaha angka hatorangan di jolo ni turpuk on sian ayat 10 – 14, dipaboa do angka pangalaho ni bangso Israel na manggunturi manang na memberontak nang mangarsahi Debata, marhite na marbalik sian dalan ni Debata. Hinorhon ni i, dipalalu Debata ma rimasNa tu angka na lilu i. Tung hansit do pambebeon ni rimas ni Tuhan i dohot tujuan, ndada asa laos mate bangsoNa i, alai asa muba do jala mulak nian muse tu Debata.


Hatorangan :
Turpuk on ima tangiang mangido asa marpangulahi roha ni Debata mida bangso na manimbil i. dionjar panghilalaan na hansit ido roha nasida mangalului pangurupion  paluahon sian parungkilonna i. diparhatopot bangso ido na so tarpangasahon nasida ompunasida si Abraham dohot si Jakob paluahon sian parungkilon nasida i. Ido umbahen didok di ayat 16, na so ditanda si Abraham nasida, jala ndang dipabotobot si Israel (Jakob) nasida. Alai sasada Debata do diparhatopot gabe Ama sipalua di nasida.
Ndang na mansoadahon si Abraham dohot si Jakob bangso i dison, alai ala adong do kesadaran di nasida, paboa naung dao manimbil pangalaho nasida sian na hinalomohon ni Jahowa Debata. Ndang jumpang di ngolu ni bangso i songon pangalaho ni si Abraham dohot si Jakob. Ido umbahen nuaeng nasida mangido asi ni roha sian Debata, songon na hinatahonna di bona ni turpuk on di ayat 15. “Sai tatap ma sian banua ginjang jala ida sian ingananMu nabadia “.
Pandohan “ tatap ma”  dohot “ ida ma “ , mangigil pambahenan tu angka jolma na mangadopi ragam ni haporsuhon dohot parungkilon. Diingot bangso ido pambahenan ni Debata Jahowa na uju i mamboan ompunasida haruar sian parhatobanan di tano Misir. Asa naeng songoni ma nian dipangido rohanasida, dibahen Debata paluahon nasida sian parungkilonna i.
Dihatorangan ni turpuk on di ayat 17-19, diulahi do muse mangaratai sibonsiri ni uhumn na songgop tu bangso i. Sambolus idaon sai hira na tu Debata Jahowa do dipasahat nasida hasalaanna i. Tarida do sian sungkun sungkun na tarsurat di ayat 17 : “ Boasa tung diloas Ho hami lilu, sian angka dalanMu ale Jahowa?, Boasa tung dipatangkang Ho rohanami, unang hu habiari hami Ho?.
Sasintongna memang na boi do nian bahenon ni Debata pangidoan ni bangso i, na boi do nian ndang diloas Debata bangso i gabe lilku, manang na boi do ndang dipatangkang Debata roha ni bangso i, asa gabe mabiar tu Debata. Alai ndang dibahen Debata songon na pinangido ni bangso i. Molo na margogo do tutu Debata mangambati jolma mardosa, boasa ndang diambati?
Alusna, ala dilehon Debata do kebebasan tu jolma i laho manontuhon ise do sitangihononhon dohot sioloan dingoluna. Jala tibu hian do i dilumbahon si Josua tu angka ompunasida di na mambongoti huta Kanaan uju i. Ai tegas do didok si Josua hatiha i, asa pilliton ni bangso i manang ise oloanna (Josua 24 : 15). Hatiha i dipadanhon bangso ido nian paboa naingkon Jahowa sioloanna, alai diose  do padan i, gabe laos ima dalanna mangae ragam ni haporsuhon bangso i.
Alani ma diharingkothon bangso i mangalualu tu Debata jala tarsunggul rohana laho martangiang mangido pangurupion asa anggiat dao sian parungkilonna i.

Panimpuli :
Minggu advent na paduahon on manosohon tu hita asa olo ro mandapothon jala mangalualalu tu Debata di angka situasi na masa dingolunta, tarlumobi ma uju jumpa na sorat i. Alai unang ma holan uju na sorat i nian hita ingot tu Debata, naeng ma disude situasi dohot kondisi na masa dipardalanan ni ngolunta. Jala naeng ma di minggu panomunomuon on, lam tatanda angka hadirionta, ai panandaion ni diri na sintong mampanghorhon do i tu sikap manang pangalahonta laho manomunomu haroroNa. Lam tatanda hadirionta, tontu lam marsigorgor ma paubahon roha. Amen.

Tidak ada komentar:

Poskan Komentar