Mametmethu do au nian manjalo sude angka asi ni rohaM dohot sude hasintongan, angka na binahenMi tu naposoMon (1 Musa 32 : 10 a)

Senin, 07 November 2011

JAMITA MINGGU 21 DUNG TRINITATIS ; 13 NOPEMBER 2011 Mateus 10 : 34 – 37




Patujolo :
Molo adong sungkun sungkun taringot tu hinatabo ni gabe halak Kristen, boi do tubu angka alus na marasing. Adong ma na mandok tabo jala sonang gabe halak Kristen, alai adong do ra na mandok ndang satorusna tabo gabe halak Kristen. Sasintongna molo bagas do pangantusionta taringot tu hakristenon, ndang hea diparbaga Jesus Kristus na ingkon tongtong tabo jala sonang molo gabe siihuthon Ibana hita di portibi on. Hea do memang didok Jesus, ro ma hamu tu au angka na loja jala na sorat, hupasonang pe hamu. Sada jaminan do i memang paboa na boi do Jesus mangalehon hasonangan tu hita. Alai di angka ayat na asing hea do muse didok Jesus, paboa nasa na mangihuthon Ibana ingkon rade do mamorsan silang. Silang dison manggombarhon sitaonon manang parungkilon do i humonghop Ibana.

Hatorangan
Hatorangan ni turpuk on, patuduhon sipata adong do keadaan na mamaksa hita ingkon mamillit, Jesus do manang keluarga. Asa marhite turpuk on, na diigil sian hita ima loyalitas manang hasatiaon maradophon Jesus Kristus. Dilehon Jesus do pilihan na tung mansai borat situtu sipillitonta, ima : Jesus do tapillit manang dirinta, Jesus do manang keluarganta, Jesus do manang ianakhonta, Jesus do manang ulaonta, dna.
Loyalitas 100 % do na dituntut sian hita marhite turpuk on. On ma na ringkot sirimangonta tarlumobi angka natoras, Alana nunga godang angka anak dohot boru ni huria i na olo pindah tu ugamo na asing alani rongkap, parkarejoan, dna.
Asa molo mangihuthon Jesus tung na so boi do satonga satonga, tegas do i didok Jesus di Lukas 9 : 62,  na mandok : “ Na manjama ninggala, huhut mamereng tu pudi, tung na so tau ma i tu harajaon ni Debata. Sian taboto tung dituntut Jesus do loyalitas penuh.
Boasa dohonon ni Jesus dison paboa na ro do Ibana pabadahon manang manirang angka parsaoran di tonga tonga ni keluarga? Na so dihalomohon Jesus do ulaning parsaoran na denggan di tonga tonga ni angka na markeluarga? Ndada na mandok haroro ni Jesus laho patubu hagaoron di tonga tonga ni keluarga, alai na nidokna dison, sotung gabe keluarga mangambati hita laho mangihuthon Ibana. Sotung gabe alani angka persoalan di rumah tangga, gabe munggil hita manang ndnag tapajonok dirinta tu Ibana. Asa ingkon jumolo do Ibana tahaholongi sian angka partalian ni keluarganta.
On ma barita sipeoponta marhite turpuk on, hasatioan na 100 persen diigil sian hita, jala ingkon humolong rohanta di Kristus Jesus sian keluarga na tahaholongi. Alai ndang gabe mandok tadinghononta jala ndang perduli be hita tu keluarganta. Alai na boi do tadinghononta keluarga i laho mangihuthon Jesus. Ai ndang tama hita gabe siseanna molo gabe humolong rohanta tu angka keluarga asa tu Tuhan Jesus.
Sai adong dope binege na olo mandok, mansohot ma jo au sian parmingguon, mansohot ma jo au sioan hasintuaonku, ai ndang boi dope pinasada roha dohot keluarga. On ma hata na jotjot binege sian angka ruas nang angka partohonan pe. Asa sipaingot ma turpuk on tu hita, unang gabe na masa di keluarga gabe mangambati hita marsaor tu Ibana.
Panimpuli :
-          Ndang sai tarbahen manongtong las ni roha molo gabe halak Kristen, alai molo tung pe soluk angka hamaolon, lam patoguhon haporseaonta ma i. jala nunga diaturhon Debata i paboa na ingkon porsaonon do silang i molo mangihuthon Ibana. Asa tapatuduhon ma loyalitas manang hasatiaon na manongtong maradophon Ibana.
-          Nasa na boi mangambati hasatiaonta tu Ibana, na ingkon boi do pasidingonta, termasuk ma i nang keluarganta. Ai ingkon humolong so rohanta tu Ibana asa tu angka na asing na adong di hita, termasuk ma nang keluarganta. Amen.

Tidak ada komentar:

Poskan Komentar